Norombahin’ny Cnaps Sport ny “Tournoi Fanantenana”, notanterahina tany Matsiatra Ambony, izay nifarana ny alahady lasa teo. Teo amin’ny fihaonana farany, lavon’ny ekipa tompondakan’i Madagasikara, tamin’ny isa tokana 1 noho 0 ny AS Adema, tompon’ny amboara.
Tsy mbola afa-bela, tamin’ny Cnaps Sport, indray izany ny Adema teto, izay efa nihaona nandritra ny famaranana niadiana ny amboaran’i Madagasikara. Fihaonana natao tao amin’ny kianjan’Ampasambazaha, ny volana novambra, tamin’ny taon-dasa.
Marihina fa tafiditra ao anatin’ny fanomanantenan’ireo klioba roa ireo, eo amin’ny fiatrehana ny fifaninanana afrikanina, ity “Tournoi Fanantenana” ity. Fotoana ihany koa nahazoan’ireo mpanazatra nanitsy ny tsy mety, mialoha izany lalao izany.
Nandritra ity lalao ity koa, nitsapa ireo mpilalao nantsoina hanatevina ny ekipa. Mbola manana roa herinandro izy ireo, hanomanana farany. Raha tsiahivina, ny asabotsy 13 febroary no hiatrika ny lalao mandroso ireo ekipa malagasy ireo ka ny Cnaps, hihaona amin’ny Gor Mahia, any Kenya, ary Adema, hifandona amin’ny Harare FC, any Zimbaboe.
Raha tsy misy ny fiovana, mety mbola hiatrika lalao sedra farany ny Adema sy ny Cnaps Sport, mialoha ny hisidinany, any amin’ireo firenena roa ireo.
Tompondaka