Anjakan’ilay Malagasy, Rasolondrazana Jacob, ny fifaninanana tenisy tanterahina atsy amin’ny Nosy Maorisy. Norombahiny indray mantsy ny “Wilson open 2016”, “tournoi” mamarana ny fihaonana, atsy Maorisy.
Nanao pao-droa, Rasolondrazana Jacob teo amin’ny fiadiana ny amboara «Wilson open 2016 », taranja tenisy. Fifaninanana notanterahina tao amin’ny Petit-camp Maorisy, ny faran’ny herinandro lasa teo. Nanjakan’i Jacob tanteraka ny lalao izay adin’ny samy Malagasy ny famaranana, teo amin’ny olo tokana. Seta 2 noho 1 (6/3 ; 6/7 (5) , 6/1) ny nandreseny an-dRandriamanantsoa Jean-Richard. Tsy vao izao akory izy mirahalahy ireto no nihaona fa efa imbetsaka ary matetika, tsy afa-bela amin’i Jacob i Jean-Richard.
Mbola lasan’i Jacob ihany koa ny lalaon’olon-droa, izay niarahany tamin’i Rambojun Hemanshu. Lavon’izy mirahalahy ireo tamin’ny seta 2 noho 0 (6/4 ; 7/5) Randriamanantsoa Jean-Richard sy i Kwok Yin Siong Yen Anthony.
Azo lazaina dia nanjakan’i Jacob avokoa, araka izany, ny tenisy atsy Maorisy satria lasany avokoa ny fandresena tamin’ireo fifaninanana rehetra natao tany an-toerana, tamin’ity taona ity. Marihina fa fifaninanana manakatona ny taom-pilalaovana atsy Maorisy ny “Wilson open 2016”.
Teo amin’ny vehivavy, nahazo ny voalohany i Amélie Boy, rehefa nandresy an’i Sarah Introcaso, tamin’ny seta 2 noho 0 (6/4 ; 6/4). Tsiahivina fa nanilika an’i Astrid Tixier, laharana voalohany atsy Maorisy, i Amélie.
Ankoatra izay, ho an’ireo mpilalao zandriny eto Madagasikara, efa eo am-panomanana ireo hiatrika ny fiadiana ny ho tompondakan’i Afrika Aostraly, sokajy U14 sy U16 lahy sy vavy, tanterahina any Windhoek Namibia, ny 9 ka hatramin’ny 18 janoary 2017, ny federasiona malagasy.
Torcelin