Tsy miandry ela. Avy hatrany mantsy, niroso tamin’ny fampivondronana ny ekipa nasionaly eo amin’ny taranja judo, sokajy zandriny (cadets, juniors), ny federasiona malagasy (FMJ). Rehefa avy niatrika ny fiadiana ny tompondakan’i Afrika sokajy « seniors » isika, manomana sahady ny fiatrehana ny eo amin’ny sokajy « cadets » sy « juniors » indray ny federasiona. Hetsika iraisam-pirenena hotanterahin’ny Union africaine de judo (UAJ) miaraka amin’ny federasiona marokanina, ny 21 – 23 jolay izao, any Maraoka, izany.
Araka izany, mpikatroka manodidina ny 40 eo ho eo efa manaraka fanazarantena miaraka, amin’izao fotoana izao. Ireo mitana ny laharana roa voalohany isan-tsokajy kosa nantsoina hanaraka io fampivondronana io. Izany hoe, ny filaharana nasionaly navoakan’ny federasiona mitondra ireo mpikatroka amin’ny fampivondronana. Noho izany, mbola handalo fitsapana ireo mpikatroka ireo ary miankina tanteraka amin’ny herijika sy ny fahaiza-manaon’izy ireo hamoahan’ireo teknisianin’ny FMJ ny listry ny ekipa nasionaly hanafika any Maraoka.
Ankoatra izay, tsy vaovao amintsika ny fiatrehana hetsika kaontinantaly. Saika nandray anjara tamin’ny fiadiana ny tompondakan’i Afrika hatrany mantsy i Madagasikara. Saingy, anisan’ireo firenena mafy aty Afrika ireo Magrebianina ireo. Noho izany, mila miady mafy sy mifantoka tsara ny ekipa nasionaly raha te hahazo vokatra tsara.
M.N.